Vetëflijimi i çiftit të moshuar nga Berati, sociologu Tushi zbulon shkaqet

22:59 | 30 Nëntor 2018
Trina Galanxhi

Emisioni “Repolitix” ka trajtuar temën e depresionit tek të moshuarit e braktisur marrë shkasë nga ngjarja tragjike e ndodhur në qytetin e Beratit, ku Kujtim dhe Këze Agalliu, përkatësisht 78 dhe 70 vjeç u vetëflijuan duke u hedhur nga kati i tetë i pallatit ku banonin.

Të ftuar në studio ishin deputetja e LSI-së, Nora Malaj; Leonard Solis, ish-ministër i Shëndetësisë; Gëzim Tushi, sociolog dhe Fadil Kepi specialist i pensioneve.

Sociologu Tushi u shpreh gjatë emisonit se problemet sociale të të moshurave në Shqipëri po rriten dita-ditës me plakjen e shoqërisë.

“Kostoja e këtyre problemeve do të bëhet më e madhe. Popullsia e Shqipërisë po plaket dhe kjo gjë kërkon politika dhe strategji të reja. Duhet të shtojmë kujdesin ndaj të moshuarve. Nuk i kemi politikat e duhura për t’u kujdesur për ta”, tha Gëzim Tushi, sociolog.